„Ótrúlega vel. Held að það séu fáir ósáttir núna,“ sagði Alexandra Jóhannsdóttir um tilfinninguna eftir 3-0 sigurinn á Póllandi í fyrsta leik í undankeppni Evrópumótsins á Kópavogsvelli í kvöld.
Lestu um leikinn: Ísland 3 - 0 Pólland
Alexandra, sem hefur verið að standa sig frábærlega með Fiorentina á Ítalíu, var á miðsvæðinu með Hildi Antonsdóttur.
Það fór aldrei um hana í leiknum þrátt fyrir ágætis byrjun pólska liðsins.
„Nei, eða jú þær fengu þarna færi í 0-0 og það hefði ekkert verið næs að fá á sig mark þá en eftir að við skoruðum fyrsta markið fannst mér við vera 'solid'.“
Alexandra man ekki vel eftir mörkunum en fannst spilið og einstaklingsframtak Sveindísar frábært.
„Fínt spil í síðasta markinu og svo gerir Sveindís bara vel, snýr og vinstri í teignum. Ég man ekki nógu vel eftir fyrstu tveimur mörkunum.“
Eins og áður kom fram var Hildur með Alexöndru á miðjunni en henni leið mjög vel að spila með henni.
„Hildur er bara mögnuð. Ég sem er með henni á miðjunni og get gert það sem ég vil og hún er alltaf tilbúin að þrífa upp allan skít eftir mig. Hún er geggjuð.“
Í stöðunni 3-0 vildi Alexandra frá boltann frá Sveindísi en fékk hann ekki. Alexandra treystir henni fullkomlega til að taka rétta ákvörðun.
„Ég treysti Sveindísi til að taka ákvarðanir og ef hún skaut eða gaf á einhvern annan þá var það örugglega bara rétt ákvörðun í þeirri stöðu.“
Geggjuð byrjun hjá íslenska liðinu og enn sætara fyrir Alexöndru, sem var að spila á sínum gamla heimavelli.
„Við förum í alla leiki til að vinna þá. Við byrjum á 3-0 sem hefði getað verið stærri sigur í dag. Ótrúlega gott. Á Kópavogsvelli, 3-0 og gott veður,“ sagði hún í lokin.
Athugasemdir