Landsliðsmaðurinn Birkir Bjarnason er án félags eftir viðskilnað við Aston Villa á gluggadegi. Hann og félagið komust að samkomulagi um starfslokasamning.
Birkir, sem er 31 árs gamall, er nú í leit að nýju félagi fyrir komandi tímabil.
Fjölmiðlamaðurinn Will Butcher er á því að nágrannar Aston Villa í West Brom eigi að leita til Birkis. West Brom ætlar að endursemja við hinn 38 ára gamla Gareth Barry, en Butcher segir að Birkir sé mikið betri kostur.
„Hann getur spilað í mörgum stöðum, vinstri bakvörður, vinstri kanti og á miðjunni. Bjarnason er svipaður leikmaður og Barry - hann er bara sjö árum yngri og í miklu betra líkamlega ástandi," skrifar Butcher fyrir The Boot Room.
Hann segir að West Brom verði að íhuga það að fá Birki þar sem hann er yngri en Gareth Barry.
Það á eftir að koma í ljós hvað gerist hjá Birki, en í samtali við Morgunblaðið segist hann geta hugsað sér að vera áfram á Englandi.
„Þetta gerist frekar óvænt en að sama skapi er mjög jákvætt að hafa klárað þetta í gær (fyrradag) áður en enska félagaskiptaglugganum var lokað þannig að ég hef enn þá tækifæri til þess að ganga til liðs við enskt lið," sagði Birkir.
Athugasemdir