Ólafur Kristjánsson, þjálfari Þróttar.
„Tilfinningin er viðbjóðsleg,'' sagði Ólafur Kristjánsson, þjálfari Þróttar, eftir grátlegt 1-0 tap gegn FH í fjórðu umferð Bestu deildar kvenna.
Lestu um leikinn: FH 1 - 0 Þróttur R.
„Þetta var eins ógeðslegt og þetta verður. Liðið búið að spila vel, búið að vinna vel og búið að vera með yfirhöndina svona fram af því að við verðum manni færri. Þá náttúrulega jafnast leikar."
„Þegar FHingarnir missa mann þá er þetta aftur orðið jafnt í liðum 10 gegn 10. Það slökknar aðeins á okkur í þessu atriði í restina. Fótboltaleikir eru kláraðir í teigunum og við vorum ekki með skerpuna í fyrri hálfleik, sem hefur verið okkar saga í byrjun móts."
Þróttur er aðeins með eitt stig eftir fjórar umferðir.
„Við höfum verið með yfirburði á ákveðnum sviðum en við erum ekki að setja boltann í netið. Við erum ekki að fá mikið af mörkum á okkur, en á meðan við skorum ekki þá er erfitt þegar andstæðingur skorar."
„Mér finnst frammistaðan, jafn skringilega og einhverjum kann að að finnast það, vera prýðileg og við þurfum að halda fast í það. Svo þurfum við að bæta það sem er að, við þurfum að vera skarpari fyrir framan markið.''
Hægt er að horfa á viðtalið í heild sinni fyrir ofan.
Athugasemdir
