Hallgrímur Mar Bergmann (KA)
Hallgrímur Mar Bergmann.
Hallgrímur Mar Bergmann skoraði eitt mark og lagði upp tvö þegar KA sigraði Víking R. örugglega 4-1 í Pepsi-deildinni á sunnudaginn. Hallgrímur er leikmaður umferðarinnar hér á Fótbolta.net.
KA hafði verið í basli í undanförnum leikjum en hvað breyttist á sunnudaginn?
KA hafði verið í basli í undanförnum leikjum en hvað breyttist á sunnudaginn?
„Við aumingjarnir frammi í sókninni fórum loksins að geta eitthvað," sagði Hallgrímur Mar brosandi við Fótbolta.net í dag.
„Nei, nei, sóknarleikurinn hefur samt ekki alveg verið til fyrirmyndar í sumar hjá okkur, en hann small loksins betur gegn Víking. Við vorum einnig að ná að halda boltanum betur innan liðsins sem við viljum gera."
Markið hjá Hallgrími var hans fyrsta í sumar og hann segir þungu fargi af sér létt. „Já mjög, ég væri að ljúga ef ég segi annað. Ég er bara þannig að ég vil alltaf vera að skora eða leggja upp fyrir liðið og það tók mun lengri tima en ég hefði viljað."
KA er með átta stig eftir sjö leiki. „Þetta er auðvitað alls ekki byrjunin sem við hefðum óskað okkur en hún var ekkert farinn inn í hausinn á einum eða neinum, sem sýndi sig ágætlega í þessum leik. Við höfum allir trú á hvorum öðrum og því sem við erum að gera," sagði Hallgrímur sem segir markmiðið einfalt hjá KA. „Ég held að það sé öllum ljóst að við viljum vera í efri hluta deildarinnar"
KA menn fögnuðu sigrinum í gær með því að skella sér í menningarferð út í Hrísey. „Hún var geggjuð," segir Hallgrímur um ferðina.
„Þetta var óvissuferð sem heppnaðist mjög vel. Ég, ásamt mörgum í liðinu höfðum aldrei komið til Hríseyjar áður, svo þetta var geggjað. Mjög fallegur staður. Ég verð auðvitað að taka það fram líka að við spiluðum frisbígolf sem ég og Aleksandar Trininic unnum leikandi."
Næsti leikur KA er við Val á Hlíðarenda á laugardaginn. „Mér líst bara mjög vel á hann, þetta er besta lið landsins og besti völlur landsis. Það verður bara skemmtilegt verkefni reyna sækja þrjá punkta á Hlíðarenda."
Domino's gefur verðlaun
Hallgrímur fær pizzuveislu frá Domino´s í verðlaun og hann er klár með sína uppskrift að pizzu. „Meet and Cheese, mínus bacon kurl, plús chilliflögur. Ég bíð enn eftir döðlum á Domino’s.. það er orðið lykilatriði hjá mér á pizzu!"
Fyrri leikmenn umferðarinnar
Leikmaður 6. umferðar - Almarr Ormarsson (Fjölnir)
Leikmaður 5. umferðar - Sito (Grindavík)
Leikmaður 4. umferðar - Aron Jóhannsson (Grindavík)
Leikmaður 3. umferðar - Emil Ásmundsson (Fylkir)
Leikmaður 2. umferðar - Gísli Eyjólfsson (Breiðablik)
Leikmaður 1. umferðar - Sveinn Aron Guðjohnsen (Breiðablik)
Athugasemdir
