Lestu um leikinn: FH 0 -  2 ÍBV

„Þetta sýnir hvert ÍBV liðið er komið. Mín tilfinning er sú að við erum komnir með gott jafnvægi í liðið og hvernig við viljum spila og stilla liðinu upp. Menn sem hafa átt eitthvað inni eru að koma með það núna. Sóknarleikurinn var fínn og við héldum boltanum vel. Það var ekkert óðagot á mönnum enda var völlurinn mjög góður. Það er svo gaman að spila fótbolta á svona, alvöru fótboltavöllum."

Eyjamenn hafa nú mætt FH-ingum tvisvar sinnum í sumar og ekki enn fengið á sig mark. Fyrri leikur liðanna endaði með markalausu jafntefli. Fyrir ári síðan, 12. ágúst 2017 varð ÍBV bikarmeistari eftir 1-0 sigur á FH. Eyjamönnum líður greinilega vel að spila gegn FH.

„Það er mjög sterkt að koma hingað akkúrat ári eftir að hafa unnið þá í bikarúrslitum og vinna þá aftur. Vonandi og ég ætlast til þess að við höldum þessu áfram, að við náum þessu andrými að ýta okkur frá botninum og aðeins viðra fyrir okkur hvert við stefnum."

En horfa Eyjamenn upp töfluna eða niður fyrir sig?

„Eigum við ekki að sjá hvernig úrslitin verða í dag og á morgun og sjá hvernig staðan er. Síðan verðum við að einbeita okkur að næsta leik sem er gegn Keflavík, sem hefur engu að tapa og mæta okkur í Eyjum og hafa örugglega gaman af því," sagði Kristján.

Viðtalið í heild sinni má sjá í sjónvarpinu hér að ofan.