Landsliðsmaðurinn Alfons Sampsted var í byrjunarliði Twente sem gerði 3-3 jafntefli við Hereenveen í hollensku úrvalsdeildinni í kvöld.
Alfons er nú búinn að festa byrjunarliðssæti hjá Twente eftir að maðurinn sem hann var í samkeppni við var dæmdur í mánaðar fangelsi í Hollandi.
Joshua Brenet hefur verið fastamaður í liði Twente en hann var dæmdur í mánaðar fangelsi í lok mars fyrir að keyra án gildra ökuréttinda í tvígang.
Alfons er því að fá tækifæri til þess að eigna sér stöðuna en hann byrjaði í kvöld í skemmtilegum leik gegn Heerenveen. Twente komst tvisvar í tveggja marka forystu en glutraði henni niður í bæði skiptin.
Þegar um klukkutími var búinn af leiknum fór Alfons af velli. Twente er í 3. sæti deildarinnar með 57 stig, átta stigum frá Feyenoord sem er í öðru sæti.
Kristófer Jónsson kom þá inn af bekknum er Triestina gerði 1-1 jafntefli við U23 ára lið Atalanta í C-deildinni á Ítalíu. Triestina er í 3. sæti A-riðils með 60 stig.
Athugasemdir