„Ég þurfti að sjá um mína vinnu og svo kláruðum við færin hinu megin," sagði Fanney sem varði virkilega vel frá Ewu Pajor í fyrri hálfleik og sá til þess að pólska liðið kæmist ekki yfir. „Glódís var einhvern veginn með hana, svo kemur skotið og ég reyni að vera fyrir. Svo er bara frákast í teignum og maður verður að stökkva á það."

Skömmu fyrir leik var Fanney að hita upp með markmannsþjálfaranum Ólafi Péturssyni og var hún þar að sýna skjót viðbrögð og vera klár í að fara í lága bolta sem kæmu nálægt henni. „Það er mjög mikilvægt að ná góðri upphitun og það hjálpar manni að koma vel inn í leikinn."

„Mér fannst við heilt yfir ná að stöðva þær mjög vel. Þær náðu einhverjum fínum fyrirgjöfum en mér fannst við alltaf ná að trufla þær sem gerði vinnuna eftir það mjög auðvelda fyrir mig. Mér fannst við loka vel á þær."

Tveir leikir með landsliðinu, tvisvar haldið hreinu. Fanney var spurð hvenær hún ætli að fá á sig mark - sem er kannski nokkuð galin spurning.

„Ég veit það ekki. Það kemur einhvern tímann, ég er ekkert mikið að hugsa um það. (Ég vil) halda hreinu eins lengi og það er hægt."

Fanney var ekki með í síðustu tveimur leikjum vegna meiðsla en hún hafði spilað leikinn á undan því gegn Danmörku í desember. Hún fékk tíðindin í gær að hún myndi byrja leikinn.

„Ég fékk að vita það í gær á æfingu, tilfinningin var mjög góð, alltaf gaman að fá traustið og sérstaklega að spila fyrir þjóðina sína. Já og nei, maður vonast alltaf til að spila og ég hefði verið svekkt ef ég hefði ekki verið með, en bara glöð að fá tækifærið."

Síðast í fyrra stóð Fanney í markinu hjá U19 landsliðinu en hefur stimplað sig inn í A-landsliðið. Hún varð nítján ára fyrir tveimur vikum.

„Það er munur á þessu, en í lok dagsins þá er þetta bara fótboltaleikur."

„Þetta var frábært, alltaf gaman þegar það er mikið af fólki í stúkunni, frábært að sjá svona marga."