„Nei, Munda bara spilaði," sagði Steini einfaldlega og var ekkert að flækja það neitt frekar. Áslaug Munda Gunnlaugsdóttir spilaði í dag sinn fimmta landsleik og leysti stöðu vinstri bakvarðar, spilaði allan leikinn.

Helena spurði Margréti Láru Viðarsdóttur, sem var sérfræðingur Stöð 2 Sport í kringum leikinn, hvort þetta gefi einhver skilaboð. Hallbera hefur átt fast sæti í landsliðinu undanfarin ár en Áslaug Munda er efnileg og gerir tilkall í byrjunarliðssæti í næsta keppnisleik.

„Ja, það er alveg hægt að lesa í það þannig að það séu einhver skilaboð með því. En það er komin gríðarleg samkeppni og Áslaug Munda hefur staðið sig mjög vel í sumar. Hallbera hefur líka gert það, spilar í einni sterkustu deild Evrópu."

„Þetta er bara samkeppni en það verður spennandi að sjá á þriðjudaginn hvort að Hallbera spili þá eða jafnvel þær báðar. Áslaug Munda getur spilað á kantinum og væri gaman að sjá þær saman vinstra megin," sagði Margrét Lára.

Ísland mætir Írlandi aftur á þriðjudag í seinni leik verkefnisins.