Tímabilið hjá Manchester United hefur verið dapurt og var það vitað fyrirfram að leikurinn í kvöld yrði erfiður.

Liverpool stýrði leiknum frá A til Ö og fagnaði 4-0 sigri. Liðið vann fyrri leikinn á tímabilinu 5-0 og var sama upp á teninginn í kvöld.

Fyrrum stórstjörnur Manchester United hafa lýst yfir miklum vonbrigðum með leikmenn United en það var þó einn sem stóð upp úr fyrir baráttuviljann og ákefðina.

Hinn 19 ára gamli Hannibal Mejbri kom inná þegar sex mínútur voru eftir af venjulegum leiktíma og sýndi meiri ákefð en liðsfélagar hans í kvöld.

„Það þurfti ungan strák til að koma inná og sýna restinni af leikmönnum hvernig á að hlaupa á eftir bolta og berjast. Ég er bara mjög stoltur af honum. Hann er sennilega ekki hrifinn af þeirri hugmynd að leikmenn Liverpool voru að spila í kringum hann. Ég vildi óska þess hinir hugsuðu eins," sagði Neville eftir tæklingu Mejbri á Naby Keita.