Niðurstaðan var markalaust jafntefli í uppgjöri liðanna með nýja þjálfara, FH og KA, í Pepsi Max-deild karla. Liðin áttust við í Kaplakrika í Hafnarfirði.

Fyrsta alvöru færi leiksins kom á 34. mínútu. „KA spilar vel upp vinstra megin, Ívar sendir boltann fyrir og þar er Almarr aleinn en stýrir skallanum yfir markið! - klaufalegt að setja þetta ekki á rammann en það var enginn nálægt Almarri að trufla hann," skrifaði Baldvin Már Borgarsson í beinni textalýsingu.

Bæði lið ógnuðu undir lok fyrri hálfleik en ekki rataði boltinn inn og staðan markalaus í hálfleik.

FH-ingar vildu fá víti í byrjun seinni hálfleiks en ekkert var dæmt og stuttu síðar skoraði Guðmundur Steinn Hafsteinsson fyrir KA en brot dæmt á Gunnar Nielsen í aðdragandanum. Steven Lennon fékk mjög gott færi á 65. mínútu en Jajalo sá við honum.

Eftir það dofnaði aðeins yfir leiknum en Lennon átti svo skemmtilega tilraun á 83. mínútu. „Fær boltann frá Atla Guðna og hamrar hann volley en beint á Jajalo sem ver boltann og KA-menn hreinsa!" skrifaði Baldvin.

Hvorugt liðið náði að setja boltann í netið, það er að segja löglega að mati dómarans, og niðurstaðan því markalaust jafntefli. FH er í sjötta sæti með 11 stig og KA í níunda sæti með sjö stig. Þjálfarar liðanna eru taplausir eftir tvo leiki.

Klukkan 20:15 hefst leikur KR og Fjölnis. Smelltu hérna til að fara í beina textalýsingu frá Meistaravöllum.