Ítalska félagið Sampdoria er nálægt því að krækja í Tammy Abraham, sóknarmann Chelsea. Abraham kæmi til félagsins á lánssamning með kaupmöguleika, en hann er einnig eftirsóttur af nokkrum af sterkustu liðum Championship deildarinnar.
Abraham er uppalinn hjá Chelsea og hefur aðeins komið við sögu í þremur leikjum fyrir aðalliðið síðan hann fékk fyrst að spreyta sig 2016.
Hann var lánaður til Bristol City tímabilið 2016-17 þar sem hann lék með Herði Björgvini Magnússyni og gerði 23 mörk í 41 deildarleik. Bristol endaði í 17. sæti Championship deildarinnar það tímabilið.
Á síðasta tímabili féll Abraham svo með Swansea City úr úrvalsdeildinni. Hann gerði 5 mörk í 31 deildarleik og skoraði tvö mörk að auki í FA bikarnum og eitt í deildabikarnum.
Abraham þykir gríðarlega efnilegur og hefur verið iðinn við markaskorun með yngri landsliðum Englands. Hann verður 21 árs í október.
Hjá Sampdoria eru fjórir sóknarmenn fyrir, Gianluca Caprari, Dawid Kownacki, Gregoire Defrel og Fabio Quagliarella.
Athugasemdir