„Þættinum barst bréf," sagði Elvar Geir Magnússon í þættinum. „KÍ Klaksvík, Færeyjarmeistararnir, voru að skoða það hvort að Emil Atlason væri falur."

Tilboðið var hins vegar engan veginn nægilega gott.

„Þeir komu víst með tilboð sem Stjarnan var aldrei að fara að samþykkja. Það voru einhverjar tvær milljónir held ég. Þú ert ekki að fara að selja Emil Atla á tvær milljónir núna. Gengi liðsins í sumar veltur á þessum manni."

„Færeyingarnir hljóta að eiga aðeins meira til en tvær milljónir eftir þeirra Evrópuævintýri. Það hlýtur að vera," sagði Baldvin Már Borgarsson en Klaksvík fór í riðlakeppni Sambandsdeildarinnar í fyrra.

„Ég er ánægður með það að Færeyjarmeistararnir séu farnir að bjóða í risa leikmenn í Bestu deildinni," sagði Elvar. „Þeir eru kannski að reyna að ná einhverjum höggum til baka. Við höfum alltaf fengið einhverja flotta leikmenn frá þeim," sagði Baldvin þá en hægt er að hlusta á þáttinn í heild sinni hér fyrir neðan.