Eftir hverja umferð í ensku úrvalsdeildinni velur Garth Crooks, sérfræðingur breska ríkisútvarpsins, lið vikunnar. Í liðinni umferð bar toppslagur Liverpool og Manchester City hæst en hann endaði með 1-1 jafntefli. Stórskemmtilegur fótboltaleikur.
Markvörður: Guglielmo Vicario (Tottenham Hotspur) - Varði glæsilega frá Nicolo Zaniolo á mikilvægum tímapunkti í 4-0 sigri Tottenham gegn Aston Villa.
Varnarmaður: Cristian Romero (Tottenham Hotspur) - Var feikilega svalur í vörn Tottenham.
Varnarmaður: Virgil van Dijk (Liverpool) - Varnarleikur hans gegn City var hreint meistaraverk. Hann var út um allan völl og setti tóninn.
Varnarmaður: Ben White (Arsenal) - Arsenal var heppið að vinna Brentford en tvær stoðsendingar White reyndust gulls ígildi.
Miðjumaður: Cole Palmer (Chelsea) - Skoraði og lagði upp í sigri Chelsea gegn Newcastle. Hefur mikla hæfileika og á skilið landsliðssæti hjá Englandi.
Miðjumaður: Declan Rice (Arsenal) - Skoraði í sigrinum gegn Brentford. Hverrar krónu virði ef hann nær að hjálpa Arsenal að verða Englandsmeistari.
Miðjumaður: John Stones (Manchester City) - Skoraði gegn Liverpool. Var besti maður Man City í leiknum og finnur sig betur á miðsvæðinu með hverjum leiknum.
Miðjumaður: James Maddison (Tottenham Hotspur) - Kom Spurs á bragðið gegn Villa. Enski miðjumaðurinn átti frábæran leik.
Sóknarmaður: Son Heung-min (Tottenham Hotspur) - Eitt mark og tvær stoðsendingar. Þarf að segja meira?
Sóknarmaður: Danny Ings (West Ham United) - Allt í öllu eftir að hann kom inná á 82. mínútu í 2-2 jafntefli gegn Burnley. Skoraði mark sem var dæmt af, skoraði þá löglegt mark og átti skot í tréverkið. Ástæðan fyrir því að Hamrarnir björguðu stigi.
Sóknarmaður: Alejandro Garnacho (Manchester United) - Gríðarlega beittur gegn Everton og skapaði vandræði fyrir varnarmenn andstæðingana trekk í trekk. Nældi í tvær vítaspyrnur.
Athugasemdir
