Mauricio Pochettino er hættur með enska úrvalsdeildarfélagið Tottenham en félagið greinir frá þessu á heimasíðu sinni.

Pochettino tók við Tottenham árið 2014 og komst með liðið í úrslitaleik enska deildabikarsins árið 2015 auk þess sem liðið fór í úrslitaleik Meistaradeildarinnar á síðasta tímabili en tapaði fyrir Liverpool, 2-0.

Gengi Tottenham á þessari leiktíð hefur verið afar slakt en liðið er í 14. sæti með 14 stig eftir fyrstu tólf leiki tímabilsins.

Liðið hefur þó gengið ágætlega í Meistaradeild Evrópu og er liðið á góðri leið með að tryggja sig áfram í 16-liða úrslitin en liðið er með 7 stig í 2. sæti þegar tveir leikir eru eftir.

„Við vorum afar hikandi með að taka þessa ákvörðun og þetta var alls ekki auðveld ákvörðun. Úrslitin í deildinni í lok síðasta tímabils og byrjun þessa tímabils hafa verið þvílík vonbrigði," sagði Daniel Levy, framkvæmdastjóri Tottenham.

Jose Mourinho, fyrrum knattspyrnustjóri Manchester United og Chelsea, er orðaður við stöðuna.

Tweet

Senda a Facebook Hafdu samband Senda frétt Prenta frétt Frétta leit