Heimild: Reuters
David Navarro tekur á sprettinn af leikvelli með leikmenn Inter á eftir sér.
Eins og við höfum greint frá sauð upp úr eftir leik Valencia og Inter í kvöld þar sem að spænska liðið tryggði sér sæti í 8-liða úrslitum Meistaradeildarinnar eftir markalaust jafntefli. Carlos Marchena sparkaði í Nicolas Burdisso og í kjölfarið fór allt í bál og brand.
David Navarro varamaður úr liði Valencia sem kom ekki við sögu í leiknum hljóp inn á eftir að leik lauk og kýldi miðjumanninn Burdisso sem féll til jarðar.
Nokkrir leikmenn Inter reyndu að stöðva Navarro þar sem hann tók á sprett út af vellinum. Slagsmálin héldu síðan áfram í leikmannagöngunum.
Francesco Toldo markvörður Inter ákvað að kíkja í heimsókn í búningsklefa Valencia eftir leikinn þar sem að lætin héldu áfram og Luis Figo og Esteban Cambiasso reyndu að gera slíkt hið sama en voru stöðvaðir af öryggisvörðum.
,,Leikmaður Valencia varð brjálaður þegar hann inn á völlinn og sló Burdisso. Hann nefbraut Burdisso. Toldo sá atvikið og það er mögulegt að hann hafi farið í búningsherbergi Valencia. Leikmenn verða að læra að haga sér á vellinum," sagði Roberto Mancini þjálfari Inter allt annað en ánægður eftir skrípalætin eftir leikinn.
David Villa framherji Valencia segir það einnig hafa verið synd hvernig leikurinn endaði.
,,Þetta var ónauðsynlegt, ljótt og sorglegt. Á svona stundum þegar að tilfiningarnar eru miklar eru sumir sem að vita ekki hvernig þeir eiga að hafa stjórn á sér," sagði Villa.
Hér að neðan eru myndir af slagsmálunum en hægt er að sjá þær stærri með því að smella á þær.
Athugasemdir
