Íslensku fótboltakonurnar okkar gerðu ágætis hluti í Evrópuboltanum í dag. Hafrún Rakel Halldórsdóttir skoraði meðal annars fyrsta mark sitt fyrir danska liðið Bröndby í 2-0 sigri á Kolding í dönsku úrvalsdeildinni.
Hafrún Rakel kom frá Breiðabliki um áramótin en hún spilaði sinn fyrsta leik einmitt gegn Kolding þann 9. mars og skoraði síðan fyrsta mark sitt í dag.
Hún og Kristín Dís Árnadóttir voru báðar í byrjunarliði Bröndby sem er á toppnum með 31 stig.
Selma Sól Magnúsdóttir og stöllur hennar í Nürnberg höfðu tapað fjórum leikjum í röð áður en liðið náði að gera markalaust jafntefli við Freiburg í þýsku deildinni í dag.
Selma var á sínum stað í byrjunarliðinu en Nürnberg er áfram í fallsæti með 9 stig, fjórum stigum frá öruggu sæti.
Ingibjörg Sigurðardóttir spilaði allan leikinn í 2-1 tapi Duisburg gegn Eintracht Frankfurt. Duisburg er á botninum með aðeins 4 stig.
Sara Björk Gunnarsdóttir kom inn af bekknum er Juventus gerði 3-3 jafntefli við Inter í meistarariðli ítölsku deildarinnar. Juventus er í öðru sæti með 44 stig, sjö stigum á eftir toppliði Roma.
Guðný Árnadóttir spilaði sinn fyrsta leik fyrir sænska liðið Kristianstad er liðið tapaði fyrir Växjö, 3-1, í sænska bikarnum í dag. Hún kom inn af bekknum í síðari hálfleik en þær Hlín Eiríksdóttir og Katla Tryggvadóttir byrjuðu leikinn og gerði Hlín eina mark Kristianstad.
Bryndís Arna Níelsdóttir, sem er á mála hjá Växjö, skoraði eitt af þremur mörkum liðsins, en hún kom frá Val fyrir áramót.
Ekki er öll von úti fyrir Kristianstad sem mætir Häcken í lokaleik riðilsins en Kristianstad þarf að vinna þann leik til að komast áfram.
Guðrún Arnardóttir lék allan leikinn í vörn Rosengård sem vann Vittsjö 3-0. Rosengård á góðan möguleika á að komast upp úr sínum riðli, en liðið er með 4 stig eins og Linköping fyrir lokaumferðina.
Matía Catharina Ólafsdóttir Gros skoraði þá eitt af fjórum mörkum Fortuna Sittard í 4-0 sigri á Utrecht í 8-liða úrslitum hollenska bikarsins.
Hún gerði þriðja mark liðsins eftir að hafa komið inn af bekknum sjö mínútum áður.
Lára Kristín Pederson og Hildur Antonsdóttir voru í byrjunarliði Sittard sem er nú komið í undanúrslit.
Athugasemdir