Heimaleikurinn er kómísk tilraun Kára Viðarssonar til að klára misheppnað verkefni föður síns: Að safna í lið af misgóðum heimamönnum til að spila heimaleik í Mjólkurbikarnum á 25 ára gamla vellinum þeirra á Hellissandi sem hefur aldrei verið notaður.

Myndin breiðir út boðskap ungmennafélagsandans um það að allir þeir sem hafi áhuga megi taka þátt í fótbolta, burtséð frá aldri, getu og kyni.

Myndin vann Einarinn, áhorfendaverðlaun Skjaldborgar 2023, og Áhorfendaverðlaun Nordisk Panorama í keppni um bestu norrænu heimildarmyndarinnar í Malmö á dögunum. Myndin er að hitta vel í mark hjá áhorfendum og er í anda þátta eins og Welcome to Wrexham og Sunderland 'Til I die þar sem ástríða lítils samfélags setur af stað öskubusku ævintýri sem gæti ekki verið skrifað.

Íslenska kvennalandsliðið fékk sérstaka forsýningu af myndinni á dögunum og KSÍ hefur gefið út myndband með viðbrögðum leikmanna sem voru vægast sagt góð.



Almennar sýningar hefjast í Smárabíó og Bíó Paradís í dag, Föstudaginn 13. Október og myndin verður í sýningum í takmarkaðan tíma. Engin fótboltaáhugamaður má láta þessa framhjá sér fara.

Leikstjórn: Smári Gunnarsson og Logi Sigursveinsson