Ísland mætir Sviss klukkan 18:45 í kvöld á Laugardalsvelli í Þjóðardeild UEFA. Milos Milojevic fyrrum þjálfari Víkings og Breiðabliks og núverandi þjálfari Mjallby í Svíþjóð er mættur á Laugardalsvöll að fylgjast með leiknum.
Milos segir að hann hafi fulla trú á að Ísland sýni flottan leik í kvöld og segir liðið eiga skilið frábæran stuðning frá stúkunni í kvöld.
„Ég er alveg viss um að við spilum vel í kvöld, mér fannst fullt af fólki alltof neikvætt eftir tapið ytra. Ég hef alltaf sagt að það sé betra að tapa einu sinni 6-0 heldur en 6 sinnum 1-0 og ég vona að landsliðið fái þann stuðning sem það á skilið enda skilað okkur frábærum árangri í mörg ár."
Milos er að þjálfa Mjallby í Svíþjóð og er búinn að koma liðinu upp í Sænsku B-deildina eftir að hafa tekið við liðinu fyrr á tímabilinu. MIlos segir að það hafi gengið eins og í sögu síðan hann tók við og kveðst ekki vera á leið aftur til Íslands.
„Allir eru mjög sáttir núna þegar fjórir leikir eru eftir og við erum komnir upp. Ég byrjaði sem aðstoðarþjálfari og yfirmaður Akademíunnar en svo hætti aðalþjálfarinn og ég tók við og það hefur gengið mjög vel."
Milos kom til landsins til að fylgjast með U21 árs landsliðinu en sagði að fyrst að var A-landsleikur líka lætur hann sig ekki vanta.
„ Ég er aðallega kominn til að horfa á U21 árs landsliðið á morgun en þegar er landsleikur þá læt ég mig ekki vanta á völlinn!!"
Athugasemdir