Fótbolti.net

fim 10. maí 2007 08:04

Hafliði Breiðfjörð

Spá Fótbolta.net í Landsbankadeild: 2. sæti

Sérfræðingar Fótbolta.net spá því að KR lendi í 2. sæti í Landsbankadeild karla 2007. Tólf sérfræðingar spá í deildina fyrir okkur þetta árið en þeir raða liðunum upp í röð og það lið sem er í efsta sæti fær tíu stig, annað sæti níu og svo koll af kolli niður í tíunda sæti sem gefur eitt stig. KR fékk 114 stig út úr þessu.

Sérfræðingarnir sem spáðu eru:
Atli Eðvaldsson, Ásmundur Arnarsson, Bjarni Jóhannsson, Gunnar Oddsson, Henry Birgir Gunnarsson, Hrafnkell Kristjánsson, Hörður Magnússon, Jörundur Áki Sveinsson, Logi Ólafsson, Luka Kostic, Pétur Pétursson, Víðir Sigurðsson, Þorlákur Árnason.

Hvað segir Ásmundur?
Ásmundur Arnarsson er sérstakur álitsgjafi okkar um Landsbankadeild karla. Ásmundur sem er þjálfari Fjölnis sem leikur í 1. deildinni hefur séð mikið af leikjum á undirbúningstímabilinu og lið hans hefur mætt mörgum af liðunum í deildinni.

Hér að neðan má sjá álit Ásmundar á KR.

Um KR:
KR liðið kemur gríðarlega sterkt til leiks þetta árið og það er greinilegt að þeir ætla sér stóra hluti. Þeir hafa bætt við sig leikmönnum eins og Pétri Marteinssyni, Jóhanni Þórhallssyni og Atla Jóhannssyni og mögueiki er á því að Rúnar Kristinnsson komi einnig og spili með þeim í sumar.

Þetta er annað árið sem Teitur Þórðarson stýrir liðinu og flestar forsendur virðast fyrir því að þetta ár verði betra en það fyrra. Teitur var með mikið æfingaálag fyrsta árið sitt á Íslandi og kom með algjörlega nýja vídd inní það hvernig æfingavikan var skipulögð.

Menn virkuðu á köflum þungir og þreyttir framan af móti í fyrra en komu svo sterkir inn þegar líða tók á sumarið. Teitur hefur aðeins breytt áherslum sínum hvað þetta varðar í vetur en þeir sem voru hjá honum í fyrra búa líklega vel að því núna.

Teitur hefur nú haft tíma til að aðlagast aðeins að Íslenskum aðstæðum og slípað enn frekar til sína taktík og áherslur. Það er mikil ánægja með hans störf í vesturbænum og hópurinn virðist sterkari í ár en í fyrra. KR kemur því sterklega til greina sem meistarakandídat í ár og mönnum í vesturbænum þyrstir líklega í titil .

Styrkleikar:
Gríðarlega skipulagðir og agaðir í sínu spili og hafa góða breidd af sterkum leikmönnum.

Veikleikar
Vantar kannski helst hraða í vörnina en þeir bæta það nú flestir upp með útsjónarsemi og góðum leikskilning.

Gaman að fylgjast með
Það eru margir ungir og efnilegir leikmenn í herbúðum KR-inga en mér finnst kannski mest spennandi að sjá hvernig Atli Jóhannsson kemur út í sumar.

Lykilmaður
Lykilmenn í KR-liðinu í sumar verða væntanlega Pétur Marteinsson og Gunnlaugur Jónsson. Ágúst Gylfason er að sjálfsögðu öflugur ef hann er heill og ef Rúnar Kristinnsson kemur til þeirra verður hann mikilvægur.

Þjálfarinn:

Teitur Þórðarson er þjálfari KR en hann samdi við félagið fyrir tímabilið í fyrra og stýrir liðinu því annað árið í röð. Á síðustu leiktíð varð KR í öðru sæti í deild og bikar undir hans stjórn. Teitur er menntaðasti íslenski fótboltaþjálfarinn en hann hefur lokið UEFA-Pro þjálfaranámskeiði í Noregi sem veitir Teiti m.a. réttindi til að þjálfa félög í efstu deild í öllum löndum Evrópu sem eiga aðild að þjálfarasáttmála UEFA (39 lönd).

Er hann gekk í raðir KR hafði hann verið í 29 ár í útlöndum sem leikmaður og þjálfari. Hann þjálfaði landslið Eistlands og nokkur lið í norsku deildinni og Svíþjóð.

Líklegt byrjunarlið KR í upphafi móts:

Völlurinn:
Aðstæða áhorfenda á KR velli hefur verið bætt til muna og nú er öll stúkan búin sætum. Auk þess aðstaða fyrir áhorfendur á trétröppum við hlið stúkunnar beggja vegna og bakvið auglýsingaskilti þeim megin sem leikmannaskýlin eru. Oft er umgjörðin í kringum leiki liðsins hvað flottust í deildinni á KR-velli. Alls komast 3500 áhorfendur á KR völlinn en þar af eru um 1600 sæti.
.

Stuðningsmenn:
Meðal þekktra stuðningsmanna KR eru: Björgólfur Guðmundsson, Björgólfur Thor, Bubbi Morthens poppstjarna, Gísli Marteinn Baldursson sjónvarpsstjarna, Ingibjörg Sólrún Gísladóttir þingkona, Bogi Ágústsson fréttamaður, Þröstur Emilsson fréttamaður, Mörður Árnason þingmaður, Egill Helgason, Haukur Hólm, Geir H. Haarde forsætisráðherra, Óli Björn Kárason, Gunnar Smári Egilsson, Bjarni Felixson íþróttafréttamaður. .

Spáin
nr.	Lið	Stig
1	?	?
2	KR	114
3	Valur	111
4	Keflavík	79
5	Breiðablik	73
6	Fylkir	62
7	Fram	51
8	ÍA	45
9	Víkingur	36
10	HK	19

Um félagið

Knattspyrnufélag Reykjavíkur
Stofnað 1899

Titlar:
Íslandsmeistarar: 1912, 1919, 1926, 1927, 1928, 1929, 1931, 1932, 1934, 1941, 1948, 1949, 1950, 1952, 1955, 1959, 1961, 1963, 1965, 1968, 1999, 2000, 2002, 2003
Bikarmeistarar: 1960, 1961, 1962, 1963, 1964, 1966, 1967, 1994, 1995, 1999
Deildabikarmeistarar
1998, 2001

Búningar:
Nike

Aðalbúningur:
Peysa: Svört og hvít / Buxur: Svartar / Sokkar: Hvítir

Varabúningur:
Svört treyja, svartar buxur, svartir sokkar

Varabúningur 2:
P: Hvít / B: Hvítar / S: Hvítir

Opinber vefsíða:
KR.is

Stuðningsmannasíða
KRReykjavik.is

Komnir og farnir

Nýjir frá síðasta sumri:

Atli Jóhannsson úr ÍBV
Óskar Örn Hauksson úr Grindavík
Stefán Logi Magnússon úr KS/Leiftri
Jóhann Þórhallsson úr Grindavík
Pétur Hafliði Marteinsson frá Hammarby
Ingimundur Níels Óskarsson frá Fjölni
Henning Jónasson frá Þrótti

Farnir frá síðasta sumri:

Gunnar Kristjánsson í Víking
Gunnar Einarsson, í Val
Sölvi Davíðsson, óvíst hvert hann fer
Sölvi Sturluson, fer í Fjölni á láni
Mario Cizmek til Króatíu
Bjarni Þorsteinsson í nám í Danmörku
Skúli Jónsson í Þrótt á láni