Heimild: kicker 

Kórónuveiran hefur haft mikil áhrif á knattspyrnuheiminn og er Schalke meðal fyrstu félaga til að lýsa yfir neyðarástandi. Leikmenn og helstu starfsmenn hafa tekið á sig 30% launalækkun en stjórn félagsins sér ekki fram á að geta borgað laun fyrir maí.

Schalke á þó rúmar 15 milljónir evra inni í sjónvarpsgreiðslum frá fyrirtækjum á borð við Sky, DAZN og ARD. Sá peningur kemur þó ekki inn ef leikirnir verða ekki spilaðir.

Það sem gæti bjargað Schalke er að þýsk félög eru byrjuð að æfa aftur og stefna á að halda áfram með fótboltatímabilið í maí.

Peter Peters, framkvæmdastjóri Schalke, segir 2. maí vera daginn sem framtíð félagsins mun ráðast. Það er dagsetningin sem næsta sjónvarpsgreiðsla á að berast til félaga í efstu deild þýska boltans.