Juanmi skoraði eina markið í tíðindalitlum fyrri hálfleik þar sem hvorugt liðið ógnaði mikið.

Síðari hálfleikurinn var aðeins líflegri en áfram var jafnræði með liðunum á vellinum. Juanmi var aftur á ferðinni á 64. mínútu og afgreiddi hann þá gestina frá Madrid með seinna markinu í 2-0 sigri.

Þetta eru afar dýrmæt stig fyrir smálið Cadiz, sem er með 22 stig eftir 28 umferðir - tveimur stigum frá öruggu sæti í deildinni. Þetta er aftur á móti skellur fyrir Atletico, sem er áfram í meistaradeildarsæti en aðeins fimm stigum fyrir ofan Athletic Bilbao sem á leik til góða.

Hugo Duro skoraði þá eina mark leiksins er Valencia lagði Getafe að velli.

Duro skoraði undir lok fyrri hálfleiks og reyndu gestirnir að jafna í síðari hálfleik en tókst ekki þrátt fyrir góðar tilraunir.

Valencia er tveimur stigum frá evrópusæti eftir þennan sigur. Getafe er fimm stigum þar á eftir.

Cadiz 2 - 0 Atletico Madrid
1-0 Juanmi ('24 )
2-0 Juanmi ('64 )

Valencia 1 - 0 Getafe
1-0 Hugo Duro ('40 )