Chelsea vann sterkan sigur gegn Newcastle þegar liðin áttust við í eina leik kvöldsins í ensku úrvalsdeildinni.

Þetta var gríðarlega fjörugur og skemmtilegur leikur en Nicolas Jackson kom Chelsea á bragðið eftir aðeins sex mínútur. Þá átti Cole Palmer skot að marki sem hafði viðkomu í Jackson og endaði í netinu.

Það tók Newcastle tíma til að komast inn í leikinn en undir lok fyrri hálfleiks skoraði sænski sóknarmaðurinn Alexander Isak með góðu skoti og jafnaði metin. Gary Neville, sem lýsti leiknum á Sky Sports, var alls ekki skemmt yfir varnarleik Chelsea í markinu.

Newcastle byrjaði hægt en Isak sá til þess að liðin fóru jöfn inn í hálfleikinn.

Eftir rétt tæplega klukkutíma leik þá tók Chelsea aftur forystuna og það var þeirra besti maður á tímabilinu, Cole Palmer, sem skoraði. Markið var mjög flott hjá þessum 22 ára gamla Englendingi.

Chelsea hafði verið að hóta þriðja markinu áður en Mykhailo Mudryk - af öllum mönnum - skoraði það á 76. mínútu. Hann nýtti hraða sinn til að skora en hann hafði þá bara verið inn á vellinum í fimm mínútur eða svo.

Jacob Murphy, sem hafði átt flotta innkomu af bekknum, skoraði laglegt mark til að gera uppbótartímann spennandi en Newcastle komst ekki lengra og 3-2 sigur Chelsea staðreynd í líflegum leik á mánudagskvöldi.

Chelsea er eftir þennan leik í ellefta sæti með 39 stig en Newcastle er með stigi meira í tíunda sæti.