Geir Þorsteinsson og Eggert Magnússon.
Fjölmiðlamenn biðu í Leifsstöð í dag eftir því hvort Roy Keane myndi mæta til landsins. Enginn Keane var sjáanlegur en Eggert Magnússon lenti þó á landinu. Fram hefur komið í fjölmiðlum að Eggert hefur verið milliliður milli KSÍ og Keane.
Í sjónvarpinu hér að ofan má sjá viðtal við Eggert.
Eggert segir að ekki hafi verið rætt að Roy Keane taki við landsliðinu. „Það hefur ekki verið rætt við hann um það að hann taki að sér þetta starf. Ég hef ekki átt í neinum viðræðum við hann um annað en hann er gamall félagi minn," segir Eggert.
Hann segist hafa boðið Keane og eiginkonu hans í heimsókn til landsins og hugmyndin hafi verið að horfa á leiki U21 og A-landsliðsins á morgun. Annríki hjá Keane hafi svo hamlað því.
Eggert segir að Keane verði því ekki á landsleiknum á morgun.
„Ég hef ekkert nema gott um Roy Keane að segja. Hann hefur geysilega gott fordæmi fyrir aðra. Hann þekkir þetta umhverfi út og inn og þess utan er hann mjög stabíll fjölskyldumaður."
