Haukur Heiðar Hauksson, fyrirliði KA, mun líklega ganga í raðir Íslandsmeistara KR fyrir helgi.
,,Viðræður eru á lokastigi. Það liggur fyrir samkomulag við leikmanninn þannig að ég tel að það sé formsatriði að klára þetta," sagði Baldur Stefánsson varaformaður knattspyrnudeildar KR við Fótbolta.net í dag.
,,KA er með tilboð frá okkur sem þeir hafa samþykkt í öllum meginatriðum og ég vona að þetta klárist í dag eða á morgun."
Haukur, sem er tvítugur hægri bakvörður, hefur þrátt fyrir ungan aldur leikið með meistaraflokki KA frá því árið 2008.
Í sumar skoraði Haukur Heiðar fjögur mörk í 20 leikjum í fyrstu deildinni með KA en hann hefur alls skorað átta mörk í 91 deildar og bikarleik með liðinu.
Á lokahófi KA á dögunum var Haukur Heiðar útnefndur sem besti leikmaður liðsins.