Óli Kristjáns þjálfari FH segir það vera óljóst hvort og hvar Castillion spili í sumar.

„Hann er samningsbundinn FH en hann er ekki að æfa með okkur. Það er óljóst hvort hann verði með okkur í sumar. Það er ákveðin biðstaða á því og við erum að reyna finna lausn á því máli með honum," sagði Óli en einhver íslensk lið hafa spurst fyrir um sóknarmanninn sem skoraði 11 mörk í 16 leikjum með Víkingum tímabilið 2017.

„Það hafa verið þreifingar en það þurfa allir að vilja það. Hann þarf að vilja vera hjá því félagi og félögin þurfa að vilja hann og geta tekið hann. Hann hefur verið í smá geymslu hjá okkur."

Þetta er vægast sagt furðulegt mál í alla staði.

„Stundum er þetta svona í fótboltanum. Það er ekki oft sem maður sér þetta á Íslandi en svona er þetta stundum."

Ólafur segir að Castillion vilji spila. Hann segir að það geti vel verið að hann spili með FH í sumar en Fimleikafélagið setur engar kvaðir að þeirra hálfu hvert hann fari.

„Það eru engar slíkar pælingar í gangi að hann megi ekki fara eitthvað. Hann þarf að vilja fara eitthvað annað og það þurfa aðrir að vilja hann og við erum að reyna finna lausn á því."

Gætu bætt við sig nýjum manni
Óli segir að þeir séu með opnar dyr fyrir nýjum leikmönnum ef upp kemur sú staða að þeir finni leikmann sem þeir telji að styrki liðið.

„Ef réttur maður finnst þá erum við opnir fyrir því að taka hann en það er ekki svo að við séum að leita. Við erum í engu stresskasti yfir því að taka einhvern nýjan leikmann. Þetta er eins og allt annað, við tökum ekki bara eitthvað inn. Ef það kemur eitthvað spennandi þá skoðum við það," sagði þjálfari FH að lokum.