Yfir 3000 manns sáu FH sigra KR á útivelli þriðja árið í röð þegar að liðin mættust á KR-velli í kvöld. Tryggvi Guðmundsson fór fyrir sínum mönnum og skoraði tvö og lagði upp þriðja markið.

FH-ingar byrjuðu með sama lið og tapaði gegn Val í meistarar meistaranna að því undanskildu að Daði Lárusson kom aftur inn í markið og þá hafði Peter Madzen jafnað sig af meiðslum og hann kom inn á varamannabekkinn. Hjá KR voru Rógvi Jacobsen og Björgólfur Takefusa í framlínunni en Grétar Ólafur Hjartarson og Garðar Jóhannsson urðu að sætta sig við sæti á varamannabekknum.

Leikurinn byrjaði vægast sagt mjög rólega í Frostaskjólinu í kvöld en eftir korter átti Björgólfur Takefusa skot úr þröngu færi sem náði þó ekki að rata á markið. Á 26.mínútu átti Guðmundur Sævarsson flotta sendingu sem kom í svæðið á milli varnarinnar og markmannsins og þar var Tryggvi Guðmundsson sem lætur ekki bjóða sér svona færi tvisvar og hann skoraði með skoti á lofti og þessi markahæsti leikmaður Landsbankadeildarinnar í fyrra kominn á blað.

Skömmu síðar átti Sigmundur Kristjánsson sendingu inn á teig og Rógvi Jacobsen átti skalla sem Daði Lárusson sló með tilþrifum yfir markið. Tryggvi var ekki hættur fyrir FH-inga og á 37.mínútu bætti hann öðru marki við fyrir Fimleikafélagið en hann skallaði þá í netið af markteig og aftur var það Guðmundur sem átti sendingu frá hægri.

Undir blálok fyrri hálfleiks áttu lukkudýr liðanna, FH-pandan og KR-ljónið svo smá syrpu þar sem þau fóru í eltingarleik fyrir framan áhorfendur en staðan þegar að leikmenn gengu til búningsherbeggja var 2-0 fyrir Íslandsmeisturum FH.

Teitur Þórðarson þjálfari KR-inga gerði breytingu í leikhléi en hann tók Skúla Jón Friðgeirsson út af og setti Guðmundur Reynir Gunnarsson inn á í hans stað en þetta er leikmenn á sautjánda og átjánda aldursári sem verður spennandi að fylgjast með í sumar. Grétar Ólafur Hjartarson kom svo inn á fyrir varnarmanninn Gunnar Einarsson snemma í síðari hálfelik og við það urðu taktískar breytingar sem fólust meðal annars í því að Rógvi datt niður á miðjuna.

KR-ingar voru eilítið meira með boltann í síðari hálfleik en náðu ekki að skapa sér neitt að ráði. Þegar korter var eftir ákvað Teitur svo að fara í þriggja manna vörn og skerpa sóknina með því að taka Vigfús Arnar Jósepsson af velli og setja Garðar Jóhannsson inn á í hans stað. Skömmu eftir þá skiptingu fengu FH-ingar færi þegar að Sigurvin Ólafsson átti skalla hárfínt framhjá gegn sínum gömlu félögum eftir fyrirgjöf frá hægri.

Þegar að þrjár mínútur voru eftir af venjulegum leiktíma náðu FH-ingar skyndisókn. Allan Dyring sendi boltann út á vinstri kantinn á Tryggva, hann sendi fyrir, boltinn fór framhjá Dyring og á fjærstöngina þar sem varamaðurinn Atli Viðar Björnsson kom á ferðinni og skoraði með viðstöðulausu skoti.

Í viðbótartíma hefði varamaðurinn Atli Guðnason getað bætt við marki fyrir FH-inga er hann fékk fínt færi eftir sendingu frá öðrum varamanni Baldur Bett en skotið fór rétt framhjá og lokatölur 3-0 fyrir Íslandsmeisturum sem byrja vel á nýju tímabili.

---

KR (4-4-2): Kristján Finnbogason, Gunnar Einarsson (Grétar Ólafur Hjartarson 67), Dalibor Pauletic, Vigfús Arnar Jósepsson (Garðar Jóhannsson 76), Skúli Jón Friðgeirsson (Guðmundur Reynir Gunnarsson 46), Bjarnólfur Lárusson, Kristinn Jóhannes Magnússon, Sigmundur Kristjánsson, Björgólfur Takefusa, Rógvi Jacobsen.
Ónotaðir varamenn: Ágúst Þór Gylfason, Atli Jónasson (M), Gunnar Kristjánsson, Tryggvi Sveinn Bjarnason.

FH (4-3-3): Daði Lárusson (M), Guðmundur Sævarsson, Ármann Smári Björnsson, Tommy Nielsen, Freyr Bjarnason, Davíð Þór Viðarsson, Sigurvin Ólafsson (Baldur Bett 81), Ásgeir Gunnar Ásgeirsson, Ólafur Páll Snorrason (Atli Viðar Björnsson 76), Allan Dyring (Atli Guðnason 87), Tryggvi Guðmundsson.
Ónotaðir varamenn: Róbert Örn Óskarsson, Heimir Snær Guðmundsson, Peter Madzen, Atli Guðnason, Hermann Albertsson.

Maður leiksins: Tryggvi Guðmundsson
Dómari: Jóhannes Valgeirsson
Áhorfendur: 3153
Veður: Mjög gott. Örlítil gjóla og sól.

Sjá einnig:
Sigurvin: Þetta var sætt
Kristján: Það vantaði samstöðu og baráttu í þetta
Tryggvi: Ef ég fæ færi þá skora ég