Gengi AS Roma hefur verið frábært eftir að Daniele De Rossi tók við en í kvöld heimsótti liðið Fiorentina í mikilvægum Evrópuslag.

Heimamenn í liði Fiorentina voru sterkari aðilinn og tóku forystuna þegar Luca Ranieri skoraði eftir hornspyrnu á 18. mínútu.

Fátt var um svör frá gestunum úr höfuðborginni og leiddi Fiorentina í leikhlé, en Houssem Aouar skoraði jöfnunarmark snemma í síðari hálfleik. Aouar skoraði þá með góðum skalla, en gleði Rómverja var skammlíf því heimamenn tóku forystuna á ný með marki frá Rolando Mandragora.

Þegar komið var á lokakaflann fékk Fiorentina dæmda vítaspyrnu og steig Cristiano Biraghi á vítapunktinn. Hann spyrnti vel, en Mike Svilar varði meistaralega til að halda gestunum inni í leiknum.

Þessi markvarsla átti heldur betur eftir að reynast mikilvæg, vegna þess að Roma fékk hornspyrnu á loksekúndum uppbótartímans og tókst Diego Llorente, sem er á láni frá Leeds United, að skora glæsilegt jöfnunarmark í kjölfarið.

Lokatölur urðu því 2-2 þökk sé þessu dramatísku jöfnunarmarki og er Roma í fimmta sæti Serie A deildarinnar, þremur stigum frá meistaradeildarsæti.

Fiorentina er fimm stigum á eftir Roma í evrópubaráttunni.