„Stuðningsmennirnir eru ekki að fara að elska einhvern annan þjálfara meira hjá Chelsea. Ég vissi að þetta yrði erfitt og við þyrftum tíma og trú," segir Pochettino sem segist vera í uppbyggingarferli með sitt lið.

„Fólk ber saman við fortíðina þegar það voru önnur verkefni í gangi. Fólk verður að skilja, ég reyni að útskýra og hreyfi munninn en fólk er ekki að hlusta."

„Við skiljum pirringinn. Við þurfum að reyna að bæta okkar spilamennsku. Við þurfum á stuðningi að halda og vonandi verða stuðningsmennirnir á bak við okkur í 90 mínútur gegn Newcastle. Við erum með ungt lið sem þarf stuðning."

Chelsea hefur eytt yfir milljarði punda í leikmannakaup síðan Todd Boehly tók yfir í maí 2022. Liðið hafnaði í tólfta sæti síðasta tímabil en þá stýrðu Thomas Tuchel, Graham Potter og Frank Lampard liðinu.

Pochettino var spurður að því hvort hann hefði íhugað að láta af störfum?

„Nei. Af hverju ætti ég að gera það? Ég mun aldrei segja upp," svaraði Argentínumaðurinn.