„Ekki algjörlega," sagði Össur við Fótbolta.net í dag. „Það eru vissir veikleikar hjá City og fyrirfram gáfu sér allir að þeir myndu rúlla yfir mína menn ekki síst í ljósi ótrúlegs meiðslalista. Á meðan gat Norwich gefið dauðann og djöfulinn í allt og bara spilað sinn ótrúlega djarfa sóknarbolta."

„Sálfræðilega hentaði þessi staða Kanarífuglunum vel enda léku þeir frá upphafi af fullkomnu virðingarleysi fyrir peningamaskínunni frá Manchester. Drengirnir sem komu inn í vörnina voru rosalega þéttir, og fyrir utan Finnann fljúgandi, Teemu Pukki, eru (Emi) Buendia og (Marco) Stieperman sjóðheitir. Svo innst inni kom mér sigurinn ekki alveg á óvart. En það var jafn ótrúlegt og dásamlegt að sjá þá leika sér að meisturunum."

Össur hefur upplifað tímana tvenna sem stuðningsmaður Norwich í gegnum tíðina en liðið kom enn á ný upp í ensku úrvalsdeildina í vor.

„Ég átti heima í Norwich þegar ég var í doktorsnámi og við Árný kona mín bjuggum í verkamannahverfi rétt hjá Carrow Road. Á þeim slóðum snérist allt um Kanarífuglana. Knæpan uppá horni var þakin Nowich-litum og þar var líf og fjör í kringum alla leiki félagsins," segir Össur.

„Félagið sikksakkaði á þessum árum milli fyrstu og annarrar deildar, þannig að borgin var eitt árið á léttu gleðifylleríi og hitt árið á svartnættisbömmer. Fótboltinn skipti öllu fyrir svo marga. Það var ekki annað hægt en smitast. Svo hef ég alltaf í lífinu stutt hina hrjáðu og smáðu svo það er eiginlega lógíst að binda ævilanga tryggð við lið einsog Norwich City Football Club," sagði Össur að lokum við Fótbolta.net.