„Þetta var bara góður sigur, mjög mikilvægur sigur," sagði Jakob Gunnar Sigurðsson leikmaður Þróttar eftir 3-2 sigur gegn Keflavík.
Lestu um leikinn: Þróttur R. 3 - 2 Keflavík
„Það er mikilvægt að vinna hérna á heimavelli, af því við erum búnir að tapa tvisvar 4-1 á heimavelli. Mikilvægt líka af því þeir voru fyrir ofan okkur, við erum búnir að vinna tvo leiki í röð núna þar sem liðin voru fyrir ofan okkur fyrir leik. Við vinnum þessa mikilvægu sigra sem er mjög gott," sagði Jakob.
Jakob var að sleppa í gegn á lokamínútum uppbótartímans þegar hann er tekinn niður af Sindra Kristni markverði Keflavíkur. Sindri fékk rautt spjald, og Jakobi fannst það klárt mál að það hafi verið réttur dómur.
„Ég heyri að hann slær boltann líka, þannig tvö rauð bara. Alltaf rautt þegar ég er búinn að pota boltanum framhjá honum og hann tekur skrefið til hliðar. Þá get ég ekkert farið framhjá honum, þannig alltaf rautt," sagði Jakob.
Jakob spilaði sinn síðasta leik fyrir Þrótt í kvöld þar sem hann er á leiðinni til Lyngby í Danmörku.
„Ég vildi spila meira (hjá Þrótt) en það er bara eins og það er, það er bara fótbolti. Vonandi get ég farið út núna og spilað mikið," sagði Jakob.
Jakob mun þá spila fyrir undir 19 ára lið Lyngby.
„Ég hef farið tvisvar á reynslu til þeirra, og sagði nei við þá. Ég sagði nei við þá áður en ég kom í Þrótt. Svo kom þetta aftur upp núna og mér fannst þetta bara gott tækifæri til að stökkva á," sagði Jakob.
Viðtalið má sjá í heild sinni í spilaranum hér fyrir ofan.
