Dagný í baráttunni á mótinu
„Við ætluðum okkur stærri hluti en spiluðum ekki nógu vel," sagði Dagný Brynjarsdóttir eftir tap gegn Noregi í síðasta leik íslenska landsliðsins á EM 2025. Liðið tapaði öllum þremur leikjum sínum í riðlakeppninni.
Lestu um leikinn: Noregur 4 - 3 Ísland
Dagnýju fannst það ekki flókið að gíra sig í leikinn þótt það hafi ekki verið neitt undir.
„Mér persónulega fannst það ekki flókið. Ég gerði þetta 2017 þá fórum við inn í síðasta leikinn og ekkert undir. Ég man hvernig tilfinningin var og mig langaði ekki að upplifa það aftur," sagði Dagný.
„Noregur var nánast með öll völd í fyrri hálfleiknum og við vorum skrefi á eftir nánast allstaðar. Þær eru með mikla breidd, það þarf ekki annað að skoða hvaða liðum þessir leikmenn eru í, ekkert nema heimsklassa lið."
Dagný kom inn á sem varamaður í kvöld en þetta var 13. leikur hennar á stórmóti. Hún jafnaði þar með met Söru Bjarkar Gunnarsdóttur en þær eru leikjahæstu leikmenn Íslands á stórmóti.
„Ég vissi það reyndar ekki. Að öllum líkindum mitt síðasta Evrópumót, ég verð orðin 38 ára þegar næsta mót er. Líkamlega held ég að ég gæti spilað það lengi en ég held ég muni ekki nenna því. Það hefði verið gaman að geta gert meira en vonandi getur Ísland gert það á næsta stórmóti."
Dagný er orðin 33 ára en samningur hennar við West Ham er runninn út og hún á eftir að taka stóra ákvörðun varðandi framtíðina á ferlinum.
„Ég hef ekkert hugsað um framhaldið. Ég er samningslaus eins og er. Ég hef nánast ekki tekið mér frí síðan strákurinn minn fæddist í fyrra. Ég byrjaði að æfa þegar hann var fimm daga gamall. Ég ætla að taka mér viku frí og bara vera mamma og ekki hugsa um fótbolta. Svo þurfum við fjölskyldan að setjast niður og ákveða hvað næsta skref verður," sagði Dagný.
„Mér finnnst erfitt að hugsa á meðan ég spila að gefa ekki kost á mér í landsliðið. Eldri sonur minn er orðinn sjö ára og veit að bestu leikmennirnir spila fyrir landsliðið, mér finnst hálfskrítið að ef ég get spilað að ég gefi ekki kost á mér í landsliðið."
