„Við byrjum leikinn ekki nógu vel, erum bara á hælunum," sagði Haraldur Freyr Guðmundsson þjálfari Keflavíkur eftir 3-2 tap við Þrótt.
Lestu um leikinn: Þróttur R. 3 - 2 Keflavík
„Við lendum 1-0 undir, en þá svona finnst mér við fyrst byrja leikinn. Við komum til baka og 1-1 staða í hálfleik. Svo er þetta bara hörku leikur í seinni hálfleik, bara mjög jafn leikur sem endar 3-2 fyrir þeim," sagði Haraldur.
Leikurinn var mjög jafn, og sanngjörn úrslit hefðu hugsanlega verið jafntefli. Þróttarar nýttu hins vegar færin sín og unnu leikinn.
„Það er alltaf fúlt að tapa, og það er ekkert spurt um hvað er sanngjarnt í þessu eða ekki. Í stöðunni 1-1 þá skorum við mark, sem af okkar mati er bara löglegt, en það er dæmd rangstaða, bara óskiljanlegt. Mörk breyta leikjum, svo lendum við 2-1 undir, svo 3-1. Við komum svo til baka í 3-2, en eins og þú segir þá var þetta 50-50 leikur og hefði getað farið hvernig sem er, en niðurstaðan er tap," sagði Haraldur.
Sindri Kristinn Ólafsson lendir í tveimur atvikum í seinni hálfleik. Í því fyrra fær hann aukaspyrnu þrátt fyrir mótmæli Þróttara en í því seinna fékk hann rautt.
„Það er klárlega brotið á honum, og réttilega dæmd aukaspyrna fyrir okkur. Ég sá ekkert hvað gerðist eftir það, það hefur varla verið mikið fyrst það var ekkert gert í því. Seinna atvikið var bara mistök hjá Sindra. Hann veður út í eitthvað sem hann á kannski ekki að gera, er óákveðinn, fær á sig hendi og réttilega dæmt rautt spjald," sagði Haraldur.
Viðtalið má sjá í heild sinni í spilaranum hér fyrir ofan.
