Hamar úr Hveragerði hefur fengið þrjá leikmenn frá Serbíu og Svartfjallalandi til liðs við sig. Markvörðurinn Robert Mitrovic og varnarmaðurinn Milos Milojevic koma frá FK Timok Zajekar og þá kemur miðjumaðurinn Mladen Ilic frá Tindastól.
Mitovic var meðal annars undir smásjá Grindvíkinga vorið 2003 og æfði með þeim um tíma. Mladen Ilic spilaði fyrir Fjölni árið 2004 og fyrir Tindastól 2005. Unnið er að dvalar og atvinnuleyfum fyrir leikmennina og er von á þeim til liðsins í byrjun maí.
Þá hafa einnig gengið til liðs við Hamarsmenn tvíburarnir Árni og Þorsteinn Vigfússynir frá Tindastóli, Brynjar Elefsen frá Tindastóli, Árni Geir Valgeirsson frá B-52 í Danmörku og Björn Aron Magnússon frá Selfossi.
Ekki er loku fyrir það skotið að fleiri leikmenn gangi til liðs við Hamar á næstu dögum og vikum segir í fréttatilkynningu frá liðinu sem ætlar sér stóra hluti í 3. deildinni í sumar og stefna ótrauðir á baráttuna um sæti í 2. deild að ári.
Athugasemdir