Síðustu leikir 8-liða úrslita enska FA bikarsins fóru fram í dag þar sem Chelsea rétt marði Everton á meðan Tottenham vann ólíklegan sigur á Manchester City til að tryggja sér sæti í undanúrslitum.
Catarina Macario kom inn af bekknum og skoraði eina mark leiksins fyrir Chelsea í jöfnum slag á útivelli gegn Everton.
Búist var við þægilegum sigri Chelsea en heimakonur reyndust afar erfiðar og voru óheppnar að skora ekki.
Þá var búist við sigri Man City á útivelli gegn Tottenham og tók stórveldið forystuna strax á sjöttu mínútu, en leikurinn var ansi tíðindalítill eftir það.
City hélt forystunni sinni allt þar til seint í uppbótartíma, þegar Bethany England tókst að gera jöfnunarmark á 96. mínútu og því þurfti að framlengja viðureignina.
Það var lítið að frétta í jafnri framlengingu og því var gripið til vítaspyrnukeppni, þar sem heimakonur höfðu betur eftir að leikmenn City klúðruðu fyrstu tveimur spyrnunum sínum.
Tottenham og Chelsea eru því komin í undanúrslit bikarsins ásamt Manchester United og Leicester City. Stórveldi Arsenal og Man City eru úr leik.
Everton 0 - 1 Chelsea
0-1 Catarina Macario ('66)
Tottenham 1 - 1 Man City
0-1 Mary Fowler ('6)
1-1 Bethany England ('96)
4-3 í vítaspyrnukeppni
Athugasemdir