Lærisveinar Michae Carrick í Middlesbrough unnu þriðja leik sinn í röð er liðið lagði Birmingham að velli, 1-0, á St. Andrews-leikvanginum í Birmingham í ensku B-deildinni í kvöld.

Eina mark leiksins gerði Riley McGree á 17. mínútu leiksins. Luke Ayling vann boltann á vallarhelmingi Birmingham og sendi boltann á McGree sem skoraði með góðu vinstri fótar skoti. Fyrsta mark hans síðan í september en alls er hann með sex mörk á tímabilinu.

Stuðningsmenn Birmingham bauluðu á sína leikmenn þegar gengið var til búningsherbergja.

Gestirnir i Boro náðu að halda þetta út í þeim síðari og var það merkilegasta sem gerðist líklega þegar Andy Davies, dómari leiksins, þurfti skiptingu. Fjórði dómari leiksins, Jeremy Simpson, tók við flautunni.

Middlesbrough sætti sig við þetta eina mark og hélt út. Lokatölur 1-0 og þriðji sigur liðsins í röð. Boro er í 9. sæti með 53 stig en Birmingham áfram í vandræðum í botnbaráttunni með aðeins 39 stig í 21. sæti.