Hákon hefur ekki enn spilað með Brentford en það gerist vonandi á næsta tímabili. Hann hefur verið á fullu í því að koma sér inn í hlutina og hefur fengið góða reynslu af því að æfa með liðinu. En hver er bestur að klára færin á æfingum hjá Brentford?

„Bryan Mbeumo er kominn til baka og hann er frábær leikmaður, alveg geggjaður. Gæðin hans á boltanum og hvað hann er góður að klára færin sín... mér finnst hann mjög góður," sagði Hákon í hlaðvarpsviðtali við Fótbolta.net í gær.

„Fyrir utan teig eru þeir alveg nokkrir með frábær skot, þeir eru með mjög stöðug skot margir. Svo er Ivan Toney frábær í teignum. Hann nær alltaf góðu skoti jafnvel þó svo að hann sé í ömurlegri stöðu. Það er málið með þessa leikmenn, þeir ná alltaf að hitta á markið og ná alltaf gefa markverðinum áskorun."

Mbeumo er að koma til baka úr meiðslum og það mun hjálpa Brentford.

„Þetta var besti leikmaður liðsins áður en hann meiddist. Hann var að gera fullt í byrjun tímabilsins, varðandi mörk og stoðsendingar. Þetta er geggjaður leikmaður og það verður gott að fá hann til baka eftir landsleikjagluggann," sagði Hákon.