Viðar gerði góða hluti með Fylki á síðustu leiktíð og var keyptur til Noregs og hefur hann staðið sig vonum framar og vakið gríðarlega athygli.

Fótbolti.net heilsaði upp á Viðar Örn í Osló, en viðtal okkar við hann verður birt í þremur hlutum.

Þrátt fyrir að Viðar Örn hafi verið með markahæstu mönnum í Pepsi-deildinni á síðustu leiktíð viðurkennir hann að þessi ótrúlega byrjun sem hann hefur átt hafi verið vonum framar.

Viðar er líkt og áður sagði með mark í leik eftir 11 deildarleiki, og er með nánast tvöfalt fleiri mörk en sá sem kemur á eftir honum.

Stefnir á gullskóinn
„Ég er spurður á hverjum degi hvort ég sé hissa. Ég er að sjálfsögðu örlítið hissa, en þetta er náttúrulega alltaf planið til að byrja með. Maður ætlar að vera einn af þeim markahæstu og reyna að skora í hverjum leik, en ég hélt aldrei að það myndi gerast svona snemma. Það er eðlilegt að fyrsta tímabilið sé ekki alveg jafn gott og maður vonaði og að tímabil tvö sé betra,“ sagði Viðar við Fótbolta.net.

„En þetta er bara draumur, ég byrjaði að skora snemma í deildinni og hef ekki hætt síðan. Maður hefur verið að nýta tækifærin rosalega vel og verið hættulegur og að skapa sér mikið. En ég held ég sé bara í vægu sjokki sjálfur.“

Viðar neitar því ekki að eftir svona byrjun sé markmiðið sett á gullskóinn í norsku úrvalsdeildinni.

„Ég hugsa að þeir séu bara búnir að setja nafnið mitt á hann,“ segir hann í gríni.

,,Neinei, en þetta er ekki eins og á Íslandi þar sem þetta var miklu jafnara. Það eru ekkert svo margir í deildinni sem eru mjög stabílir í markaskorun en ég hef verið það, og var það í fyrra. Það er mikill munur og að sjálfsögðu hugsa ég um gullskóinn og stefni á hann. Með þessu áframhaldi ætti ég að ná því.“

Hefur meiri tíma til að leggja meira á sig
Viðar segist hafa þroskast mikið undanfarið og að hann hafi bætt sig sem leikmaður frá því að hann kom til Noregs.

„Ég held ég sé bara búinn að þroskast mikið, ég hef þroskast mjög mikið á undanförnum árum. Ég held ég sé orðinn mun heilsteyptari en í fyrra. Ég klúðraði allavega einu víti í deildinni í fyrra og missti vítaskyttutitilinn hjá Fylki,“ sagði Viðar.

,,Nú er ég búinn að skora úr fjórum vítum, það er meira líka að falla með mér og maður hefur meiri tíma í að leggja meira á sig núna og bæta allt sem þarf að bæta. Ég held maður sé búinn að bæta sig síðan í fyrra,“ sagði Viðar.

Fer í tvö til þrjú viðtöl á dag
Hann viðurkennir að athyglin sem hann hefur fengið vegna markaskorunarinnar sé mjög mikil, en hann þarf oft að fara í 2-3 viðtöl á dag og láta fjölmiðlarnir hann ekki í friði.

„Ég fer án gríns í tvö til þrjú viðtöl á dag og ég er búinn að fara í marga sjónvarpsþætti. Þetta er rosalega mikið, maður fær rosalega mörg símtöl líka. En ég setti pressu á sjálfan mig fyrir tímabilið, ég var spurður hvað ég ætlaði að skora mörg mörk og ég sagði allavega 10-15 og ég ætlaði að vera einn af þeim markahæstu. Þeir geta allavega ekki böggað mig á þessum orðum eftir tímabilið, eða ég vona ekki. Fyrsta markmiðið mitt er komið og seinna markmiðið er á leiðinni. Ég ætla nú ekki að uppljóstra því, en þeir eru rosalega aggressívir hérna fjölmiðlarnir,“ sagði Viðar.

„Þeir hafa rosalega mikinn áhuga á þér og persónulega lífi þínu. Þeir hafa komið með milljón fréttir á netinu af einhverju sem ég veit ekki einu sinni af, og eru mikið að spyrja að sömu spurningum. Þetta er bara svona hérna, þetta er stærra land og meira af miðlum. Maður er kannski búinn að vera svolítið mikið í fjölmiðlum og ég vona að fólk sé ekki komið með leið á mér, en ég verð bara að venjast þessu. Þetta er bara hluti af því að vera knattspyrnumaður og vera á milli tannanna á fólki.“

„Ef ég væri aðeins yngri, þá væri þetta kannski skemmtilegra. En maður er 24 ára gamall. Þetta er svosum allt í lagi, en þetta verður þreytandi með tímanum, því þetta er það mikið. Þetta eru ekki 2-3 viðtöl á viku, þetta eru 2-3 viðtöl á dag. Ég er oft í klukkutíma eftir æfingu í einhverjum viðtölum varðandi alls konar málefni og það getur verið svolítið þreytandi.“

1. hluti: ,,Oft spurður af hverju Íslendingar eru svona góðir"

Fótbolti.net þakkar Kenneth Myhre fyrir ljósmyndirnar.