Selfoss 1 - 3 Þór (í kvöld 18)
Þórsarar skella sér suður Kjöl og keyra yfir Selfyssinga eins og þeir keyrðu yfir Leikni um helgina, bæði lið rótera aðeins í liðinu og þar koma ungu og efnilegu leikmenn Þórs sterkir inn.

ÍA 2 - 2 Afturelding - 2-3 eftir framlengingu (á morgun 17:30)
Hörkuleikur, slagurinn um Kjarlarnesið og liðin sem börðust af krafti um sætið í Bestu deildinni í Lengjunni fyrir tveimur árum, Mosfellingar koma með blóð á tönnunum inn í þennan leik og klára hann í framlengingu þar sem Mosfellingar fá virðingu og góður dómari leiksins dæmir réttmæta vítaspyrnu á Skagamenn sem taka samt klassíska Skagatryllinginn.

KR 3 - 4 ÍBV (á morgun 18)
Eyjamenn mæta og hefna fyrir deildartapið um helgina, KR skorar sín klassísku 3+ mörk en Omar Sowe nýtir sér 30 metrana milli varnarlínu KR og Halldórs Snæs markmanns og klárar þennan leik fyrir Eyjamenn.

Keflavík 3 - 1 Víkingur Ólafsvík (á morgun 18)
Keflvíkingar koma trylltir inn í þennan leik þar sem þeir halda að ÞÞÞ sé frá Snæfellsnesi en ekki Skaganum og fyrir vikið fá Ólafsvíkingar að kenna á því í þetta skiptið, ekki ólíklegt að Nacho Heras fái aftur rautt fyrir að tala spænsku.

Valur 3 - 0 Þróttur (á morgun 19:15)
Valsmenn eru of stór biti fyrir vini mína í Laugardalnum, Bjarni í Papco verður vant við látinn að þessu sinni og við það fer vindur úr seglum Þróttara sem lenda í Orra Hrafns hakkavélinni sem skorar amk eitt, látið ykkur bregða ef það verður með skalla.

Kári 2 - 2 Stjarnan - 3-4 eftir framlengingu (á morgun 20)
Stjörnumenn lenda í alvöru vandræðum í Höllinni hans Svenna Hlö en þeir munu þó ekki missa hausinn eins og Fylkismenn þrátt fyrir ítrekaðar tilraunir Marinós Hilmars til að taka menn úr sambandi, Káramenn komast yfir og verða yfir í hálfleik en Stjarnan klórar í bakkann, kemur leiknum í framlengingu og klárar svo leikinn þar því Alli Davors er bara búinn að vera að drilla langan upp í horn og kraftmikil hlaup en of lítill fókus á standið, allir í Kára springa nema Hérastubbur, besti bakari Skagans sem er í hrotta standi þetta árið.

KA 1 - 2 Fram (fimmtudag 18)
Akureyringar verða lamdir niður á jörðina og sumarið svo gott sem eyðilagt þar sem þeir halda áfram þungum, þreyttum og vondum frammistöðum, Framarar mæta gíraðir til leiks enda horfir Rúnar Kristins á þetta Evrópudeildarsæti sem bikarinn gefur eins og David horfir á Victoriu Beckham undir fjögur augu.

Breiðablik 1 - 1 Vestri - Vestri vinnur í vító (fimmtudag 19:15)
Vestramenn vilja hefna fyrir tapið í deildinni, Blikar líklegast án Höskuldar er mínus og keppnisskapið og geðveikin í Davíð Smára er plús. Blikar halda mikið í boltann en skapa lítið af alvöru færum, Arnór Borg skorar annan leikinn í röð og svo klára Vestramenn þetta í vító.