Eitt ár er í dag liðið síðan íslenska karlalandsliðið í fótbolta tryggði sér sæti á Heimsmeistaramótið í Rússlandi sem fram fór í sumar.
Ísland mætti Kósóvó á Laugardalsvelli en sigur myndi endanlega tryggja sæti í lokakeppni HM. Leikurinn byrjaði rólega og það var ekki fyrr en á 40. mínútu leiksins sem að Gylfi Þór Sigurðsson braut ísinn og kom íslenska liðinu yfir.
Jóhann Berg tvöfaldaði síðan forystu Íslands á 68. mínútu og þar við sat. Í þann mund sem Harald Lechner dómari leiksins flautaði til leiksloka braust út mikill fögnuður í Laugardalnum og stuðningsmenn íslenska liðsins fylgdust með flugeldasýningu á vellinum.
Fjörið hélt áfram í miðbæ Reykjavíkur en þangað komu strákarnir okkar með rútu niður að Ingólfstorgi þar sem að landsþekktir listamenn tróðu upp.
1. desember var síðan dregið í riðla í Moskvu og eins og kunnugt er dróst liðið í svokallaðan dauðariðil með Argentínu, Króatíu og Nígeríu.
Fyrir einu ári siðan tryggði Íslands sér á HM á troðnum Laugardalsvelli og uppselt á alla leiki á korteri. Núna ári síðar næst ekki að selja fleiri en 2000 miða á Ísland - Sviss. 3.deildar mæting. Stutt á milli i þessu #fotboltinet
— Magnus Andresson (@MagnusAndresson) October 9, 2018
Ár síðan við komumst á HM og kysstumst og vorum spennt! 👏🏼 https://t.co/UKph30OfWv
— Edda Sif Pálsdóttir (@EddaSifPalsd) October 9, 2018
Athugasemdir