Rúnar Kristinsson, fyrrum landsliðs- og atvinnumaður og nú þjálfari Fram, var til viðtals í hlaðvarpsþættinum Svona var Ísland á dögunum. Jóhann Skúli Jónsson og Orri Eiríksson eru umsjónarmenn þáttarins og fóru yfir árin 1986-2000 hjá íslenska karlalandsliðinu með Rúnari.
Talsvert var rætt um leikina gegn Frakklandi í undankeppninni fyrir EM 2000. Ísland gerði 1-1 jafntefli í fyrri leiknum og var í jafnri stöðu gegn Frökkum, 2-2, þegar seinni leikurinn var hálfnaður.
Talsvert var rætt um leikina gegn Frakklandi í undankeppninni fyrir EM 2000. Ísland gerði 1-1 jafntefli í fyrri leiknum og var í jafnri stöðu gegn Frökkum, 2-2, þegar seinni leikurinn var hálfnaður.
Rúnar átti magnaðan leik á Laugardalsvelli og fékk 10 í einkunn hjá DV.
„Þessi Zidane getur ekkert, þetta eru allt einhverjir pappakassar, ekkert betri en við" sagði Rúnar að Guðjón Þórðarson, landsliðsþjálfari, hefði sagt á fundinum fyrir heimaleikinn. „Við trúðum þessu, lágum til baka en spiluðum oft ágætlega þegar við unnum boltann. Gaui fékk menn til að trúa. Hann var snillingur í því að fá fólk með sér og hafa trú á verkefninu. Hann var líka grjótharður og þú þorðir ekkert annað en að hlaupa fyrir hann."
Rúnar var spurður út í eitt atvik úr leikjunum gegn Frökkum, en hann klobbaði goðsögnina Zinedine Zidane í seinni leiknum.
„Ég klobbaði Deschamps á Laugardalsvellinum, þá tók ég boltann með mér eftir klobbann. Þetta var sendingarklobbi gegn Zidane, en það var sögn í honum. Það var búið að vera grín á æfingum í reitarbolta að allir sögðu klobbi og svo sent í gegnum einhvern."
„Maður er svo ruglaður, boltinn datt fyrir mig í seinni hálfleiknum og þá kemur Zidane askvaðandi, ég segi bara „klobbi" og svo sendi hann í gegn. Sendingin hitti held ég alveg örugglega samherja, stuttur bolti," sagði Rúnar léttur.
Athugasemdir