Nürnberg virðist vera ætlað að falla eftir annað óheppilegt jafntefli í fallbaráttunni.

Nürnberg átti þrjá fallbaráttuslagi í röð og vann þann fyrsta gegn Alfreði Finnbogasyni og félögum í Augsburg. Liðið var síðan óheppið að gera jafntefli við Stuttgart og í dag var óheppnin aftur á ferðinni gegn Schalke.

Heimamenn í Nürnberg voru betri stærstan hluta leiksins en bæði lið fengu góð færi. Yuya Kubo skoraði fyrsta mark leiksins á 83. mínútu við mikil fagnaðarlæti, sem voru þó skammlíf því serbneski varnarmaðurinn Matija Nastasic jafnaði tæplega tveimur mínútum síðar.

Mark Nastasic var afar heppilegt og kom í kjölfarið af hornspyrnu, en fast skot fyrir utan teig fór í varnarmann og náði Nastasic að teygja sig í boltann til að stýra honum í netið.

Lokatölur voru því 1-1 og þess má geta að heimamenn klúðruðu vítaspyrnu í fyrri hálfleik.

Nürnberg er í næstneðsta sæti þýsku deildarinnar, sjö stigum frá Augsburg í öruggu sæti. Aðeins þrjú stig eru í Stuttgart sem vermir umspilssæti og því eru enn góðir möguleikar á að félagið bjargi sér frá falli. Það hjálpar þó ekki að næstu leikir eru gegn Leverkusen, FC Bayern, Wolfsburg og M'Gladbach.