Hörður Björgvin Magnússon fór meiddur af velli þegar CSKA Moskva fór með öruggan sigur af hólmi gegn Ufa í rússnesku úrvalsdeildinni á þessum fallega laugardegi.
Hörður fór meiddur af velli í síðasta leik fyrir landsleikjahlé en fór samt með íslenska landsliðinu í leiki gegn Sviss og Belgíu. Hörður spilaði allan leikinn gegn Belgíu.
Hörður þurfti að fara meiddur af velli á 25. mínútu. Timur Xhamaletdinov, leikmaðurinn sem var settur inn á fyrir Hörð, gerði sér lítið fyrir og skoraði tvö af mörkum CSKA í leiknum. CSKA vann 3-0.
Vonandi fyrir Hörð eru meiðslin ekki það alvarleg en næsti leikur CSKA er gegn Viktoria Plzen í Meistaradeildinni á miðvikudag.
Arnór Sigurðsson, Skagamaðurinn efnilegi, var allan tímann á varamannabekknum hjá CSKA í leiknum. Hann var keyptur frá Norrköping á dögunum.
CSKA er í fjórða sæti rússnesku úrvalsdeildarinnar með 12 stig þegar sjö leikir eru búnir.
Athugasemdir