Man City er án margra leikmanna vegna meiðsla og eru þrír lykilmenn tæpir fyrir leikinn. Ástandið er talsvert betra hjá Everton þar sem Idrissa Gana Gueye er einn á meiðslalistanum.

David Silva og Benjamin Mendy eru meðal meiddra leikmanna City en Sergio Agüero, Kevin De Bruyne og John Stones eru tæpir. Það er þó talið líklegt að Agüero og De Bruyne geti byrjað leikinn í dag.

City kemst aftur á topp úrvalsdeildarinnar með sigri en Everton getur komist yfir Manchester United og upp í sjötta sæti með sigri.

Jóhann Berg Guðmundsson og félagar í Burnley eiga útileik gegn Tottenham á meðan Aron Einar Gunnarsson og félagar í Cardiff heimsækja Watford.

Crystal Palace á leik við Leicester og Huddersfield mætir Newcastle í fallbaráttunni á meðan Wolves tekur á móti Bournemouth í spennandi viðureign.

Fulham tekur svo á móti West Ham í síðasta leik dagsins þar sem hart verður barist enda er um Lundúnaslag að ræða.

Leikir dagsins:
12:30 Manchester City - Everton (Stöð 2 Sport)
15:00 Crystal Palace - Leicester
15:00 Huddersfield - Newcastle
15:00 Tottenham - Burnley
15:00 Watford - Cardiff
15:00 Wolves - Bournemouth
17:30 Fulham - West Ham (Stöð 2 Sport)