Fjölnir er á toppnum í B-riðli Reykjavíkurmóts kvenna með sex stig eftir að hafa unnið ÍR, 4-2, í Egilshöllinni í kvöld.

Anna María Bergþórsdóttir kom Fjölni yfir á 9. mínútu en ÍR-ingar jöfnuðu er Þórkatla María Halldórsdóttir kom boltanum í netið á 24. mínútu.

Fjölnir komst aftur í forystu á 68. mínútu með marki frá Anítu Björgu Sölvadóttur og tókst Fjölnisstelpunum að bæta við tveimur til viðbótar er Harpa Sól Sigurðarsdóttir og Adna Mesetovic skoruðu undir lok leiks.

Lovísa Guðrún Einarsdóttir náði í eitt sárabótarmark fyrir ÍR áður en flautað var til leiksloka.

Fjölnir er eins og áður segir með 6 stig en ÍR er án stiga. Fjölnir og Þróttur mætast í næstu viku en eitt er víst, annað liðið mun fara í úrslitaleikinn gegn Val eða Víkingi.