David Moyes, fyrrum stjóri Everton, Manchester United og fleiri liða, sagði í viðtali í dag að hann hefði komið Everton í Meistaradeildina sem stjóri ef hann hefði haft sömu peninga til að eyða og Marco Silva, núverandi stjóri Everton hefur eytt á þessari leiktíð.

Moyes stýrði Everton á árunum 2002-2013 og kom þeim einu sinni í Meistaradeildarsæti. Það var tímabilið 04-05 en Everton datt út í undankeppni Meistaradeildarinnar.

„Ef við hefðum haft pening í að kaupa heimsklassa framherja hefðum við verið reglulega í Meistaradeildinni," sagði Moyes í viðtali við beIN SPORTS.

„Við höfðum ekki þann pening sem Everton hefur núna. Ég var í góðu sambandi við Bill Kenwright. Þegar ég tók við sagði hann mér að ég fengi fimm milljónir punda á hverri leiktíð."

„Við þurftum að selja leikmenn eins og Rooney, Lescott, Rodwell og Arteta. Stundum þarf að gera það þegar félagið hefur ekki mikið fjármagn til að vinna með."