Valencia komst tveimur mörkum yfir í fyrri hálfleik og náði Lionel Messi að minnka muninn eftir leikhlé. Börsungum tókst ekki að jafna leikinn þrátt fyrir mikinn sóknarþunga og er þetta í fyrsta sinn í fimm ár sem Barca vinnur ekki bikarinn.

„Fyrir mánuði síðan fögnuðum við deildartitlinum og undirbjuggum okkur fyrir þrennuna. Við vorum með miklar væntingar og erum vonsviknir," sagði Valverde, sem vill ekki kenna hugarfari leikmanna um eins og eftir tapið gegn Liverpool.

„Ég get ekki kennt leikmönnum um tapið í dag, þeir gáfu allt í þetta og ég held að þetta hafi ekki snúist um hugarfar í þetta skiptið. Valencia gekk einfaldlega betur í leiknum."

Starf Valverde var talið í hættu en Josep Bartomeu, forseti Barca, hefur ítrekað sagt að Valverde verði áfram hjá félaginu. Þetta endurtók hann eftir tapið gegn Valencia.