Nágrannaliðin Víðir og Reynir mætast í annarri deildinni dag og því er ekki úr vegi að kanna stemninguna hjá Víði Garði.

Rúnar Dór Daníelsson, markvörður og fyrirliði Víðis, svaraði nokkrum spurningum.

Hvernig er stemningin hjá Víði þessa dagana?
Stemningin hjá Víði er góð þessa dagana enda búið að vera eindæma veðurblíða í Garðinum undanfarið og meira að segja dottið í logn nokkrum sinnum. Undirbúningstímabilið byrjaði ekki of vel hjá okkur enda hafði liðið misst marga leikmenn, en liðið styrktist eftir því sem á leið og úrslitin fóru að verða hagstæðari. Íslandsmótið hófst svo um síðustu helgi þar sem að við gerðum jafntefli við Hött í leik sem við áttum að vinna þannig að menn eru staðráðnir í að bæta fyrir það í næsta leik.

Er mikill fótboltaáhugi í Garðinum?
Áhuginn er mikill þótt mætingin á leiki mætti alveg vera meiri. Ég man þá daga er fólk flykktist á völlinn og mikil stemming var í kringum félagið, þetta var á þeim tíma þegar Víðir var í efstu deild. En fólk fylgist samt vel með gengi liðsins og ber hlýjan hug til félagsins.

Er liðið mikið breytt frá því í fyrra?
Það hafa orðið nokkrar breytingar á leikmannahópnum. Knútur Rúnar Jónsson fór í Víking R, Björn Bergmann Vilhjálmsson fór til Noregs og svo eru Ratislav Lazorik og Geir Brynjólfsson hættir. Einnig vorum við með nokkra Serba sem fóru aftur til síns heima. En við höfum fengið nokkra unga leikmenn í staðinn sem hafa fallið vel inn í hópinn og von er á Serbum fljótlega og vænti ég þess að þeir nái að fylla þessi skörð sem hinir skildu eftir sig.

Hvernig er stemningin fyrir grannaslagnum í dag?
Mjög góð, áhuginn fyrir leiki gegn Reyni er alltaf mikill meðal bæjarbúa. Völlurinn er góður og allar aðstæður til knattspyrnuiðkunar eins og best verður á kosið. Við ætlum okkur ekkert minna en 3 stig gegn Reyni, það kemur ekkert annað til greina á heimavelli.

Er rígurinn á milli þessara lið meiri eða minni nú en áður?
Það er alltaf smá rígur, maður vill ekkert vera að tapa fyrir nágrannaliðinu. Ég held reyndar að þetta hafi verið verra hér áður fyrr. En annars veit ég ekki hversu mikið Reynismenn spá í því núna þar sem að það voru mjög fáir uppaldir Sandgerðingar í hópnum hjá þeim í síðasta leik.

Ykkur er spáð 5.sæti í deildinni. Telur þú að það sé raunhæf spá?
Jájá, svona miðað við gengi okkar á undirbúningstímabilinu og hvað við höfum misst sterka leikmenn.

Hver er helsti styrkleiki ykkar?
Við höfum ákveðinn kjarna heimamanna sem hefur spilað lengi saman og þekkja hvorn annan vel.

Hver eru markmið ykkar fyrir sumarið?
Við höfum sett okkur markmið og ætlum bara að halda þeim fyrir okkur.

Hvaða lið telur þú að sé sigurstranglegast í 2. deildinni í sumar?
Ég myndi halda að Reynir ættu að gera góða hluti með allan þennan mannskap sem þeir hafa fengið, Grótta hafa verið mjög sterkir á undirbúningstímabilinu og eru með vel mannað lið sem ætti að geta náð langt. Þá má ekki gleyma Njarðvík sem ég tel að verði ofarlega í töflunni.

Eitthvað að lokum?
Vil bara hvetja fólk til að mæta á völlinn í dag og styðja við bakið á liðinu gegn grönnum okkur úr Sandgerði.

Eldra úr liðnum "Hvað er að frétta?"

1.deild:
KA (15.maí)
Víkingur Ólafsvík (26.mars)
Þór (15.maí)

2.deild:
BÍ/Bolungarvík (29.apríl)
Hamar (21.apríl)
ÍH/HV (17.apríl)
Reynir Sandgerði (3.apríl)

3.deild:
Árborg (14.maí)
Berserkir (1.maí)
Draupnir (25.mars)
Einherji (16.apríl)
KFK (20.maí)
KFR (31.mars)
KFS (30.apríl)
Léttir (8.maí)