Lestu um leikinn: Ísland 1 -  1 Tékkland

„Við vorum ekki á tánnum og það var alveg sama hvað það var. Það var bara erfitt fyrir okkur. Þetta var ekki góður dagur fyrir okkur sem heild.“

„Við vissum nákvæmlega hvernig þær myndu spila og þetta var ekki góður dagur fyrir okkur. Það er ógeðslega dýrkeypt og erfitt að kyngja þessu.“

„Mér fannst góður andi í liðinu en ég veit eiginlega ekki hvað ég á að segja. Ég verð eiginlega að fá að hringja í þig eftir svona tvo daga þegar ég er búin að horfa á leikinn og greina þetta. Ég veit ekki hvað klikkaði. Þetta var allt út um allt,“ sagði Sif sem var ennþá að reyna að ná utan um leikinn.

Úrslitin eru svekkjandi og ljóst að Ísland er ekki á leiðinni á HM í Frakklandi. Sif er eðlilega hundsvekkt yfir því en telur framtíðina bjarta hjá Íslandi.

„Við eigum ótrúlega ungt og efnilegt lið. Ég vona að margar skrefi stígi skrefið og fari út. Ég held að það geti orðið mjög þroskandi fyrir þær margar. Þetta er spennandi. Við erum með góð yngri landslið sem eru að gera góða hluti. Framtíðin er klárlega björt. Svo sjáum við til hvort að við gömlu fáum að fljóta með aðeins lengur. Það kemur í ljós.“

Sif er aldursforseti íslenska liðsins, 33 ára gömul, en hefur verið okkar jafnbesti leikmaður í undankeppninni og virðist eiga nóg eftir á tanknum. Fréttaritari ýjaði að því við hana að hún fengi ekkert að hætta á næstunni en Sif segist ætla að skoða sín mál.

„Mér líður vel en ég þarf að setjast niður með fjölskyldunni og ræða þetta. Við sjáum til,“ sagði Sif að lokum en hægt er að horfa á allt viðtalið við hana í spilaranum hér að ofan.