Georginio Wijnaldum kom Liverpool gegn Genk á Anfield eftir aðeins 14 mínútur. Liverpool var sterkari aðilinn í fyrri hálfleiknum, en gestunum tókst að jafna þegar innan við fimm mínútur voru eftir af fyrri hálfleik. Mbwana Samatta skoraði þá eftir hornspyrnu.

Staðan var 1-1 í hálfleik á Anfield. Snemma í seinni hálfleiknum komst Liverpool aftur yfir þegar Alex Oxlade-Chamberlain skoraði. Hann sneri í teignum eftir sendingu Mohamed Salah og skoraði með góðu skoti.

Það reyndist sigurmark Liverpool í leiknum, lokatölur 2-1. Ekki besta frammistaða Liverpool, en sigur er sigur.

Liverpool er núna á toppi riðilsins með níu stig og er Genk á botninum með eitt stig.

Í hinum leik riðilsins gerðu Napoli og Genk 1-1 jafntefli. Hirving Lozano jafnaði fyrir Napoli eftir að Erling Braut Haaland hafði komið Salzburg yfir.

Napoli er í öðru sæti með átta stig og Salzburg er í þriðja sæti E-riðils með fjögur stig.

Magnaðar endurkomur
Chelsea fékk Ajax í heimsókn og úr varð gríðarlega eftirminnilegur leikur.

Hakim Ziyech sýndi mikil gæði í fyrri hálfleiknum, en að honum loknum var staðan 3-1 fyrir Ajax. Hann lagði upp annað markið fyrir Quincy Promes og átti svo aukaspyrnuna í þriðja markinu sem fór í stöngina, í Kepa, markvörð Chelsea, og inn.

Donny van de Beek kom Ajax í 4-1 eftir 55 mínútur, en á 63. mínútu minnkaði Cesar Azpilicueta muninn fyrir Chelsea.

Þegar um 20 mínútur voru eftir af venjulegum leiktíma dró heldur betur til tíðinda þegar Chelsea fékk vítaspyrnu og tveimur leikmönnum Ajax, Daley Blind og Joel Veltman var vikið af velli með rautt spjald á 10 sekúndna kafla.

Blind fékk sitt annað gula spjald fyrir tæklingu á Tammy Abraham og Veltman fékk sitt annað gula fyrir hendi. Jorginho steig á vítapunktinn og skoraði.

Reece James jafnaði svo fyrir Chelsea á 74. mínútu. Chelsea þá búið að koma til baka úr 4-1 í 4-4, og tveimur mönnum fleiri.

Azpilicueta skoraði það sem virtist vera sigurmark Chelsea, en það var dæmt af eftir að hafa verið skoðað með VAR. Það var dæmd hendi í aðdragandanum.

Chelsea náði ekki að koma inn sigurmarki og lokatölur 4-4 í ótrúlegum leik.