Svartur blettur á leiknum að fá mark á sig
„Já, mjög góður sigur í dag, frábær sigur. Hundfúll með að fá mark á okkur, mér fannst það setja svartan blett á leikinn en heilt yfir var þetta vel spilaður leikur. Við duttum aðeins í værukærð í seinni hálfleik, svona þegar þetta var komið og ég var ekki nógu ánægður með það. Ég hefði viljað halda áfram og bæta við, þetta gæti orðið keppni um markatölu," sagði Halldór Jón Sigurðsson, Donni, þjálfari Þórs/KA eftir sigur á Stjörnunni í kvöld. Leikurinn var mikill toppslagur en Akureyringar reyndust mun sterkari.
Lestu um leikinn: Þór/KA 3 - 1 Stjarnan
„Við hefðum getað bætt við en það hafðist ekki í dag. Ég er ekkert ósáttur með þrjú mörk, alls ekki, það hefði verið skemmtilegra að bæta við mörkum en ég er hundfúll að við skyldum fá þetta mark á okkur," sagði Donni.
Mark Stjörnunnar kom eftir spyrnu frá vítateigsboganum og boltinn fór yfir Johönnu Henriksson í marki Þórs/KA, sem er ekki mjög hávaxin og augljóst að Stjörnukonur ætluðu að láta á hana reyna.
„Já, bara lélega gert hjá markmanninum, hún veit það alveg sjálf. Það þarf ekkert að fara í kringum það neitt, þetta eru hennar mistök og hún bætir fyrir það. Hún var stórkostlega í síðasta leik þannig að hún átti þetta inni og eigum við ekki að segja það, hún gerir ein mistök núna og við vinnum leikinn samt sem áður sannfærandi."
Það má samt sem áður búast við því að nýr markmaður komi í Þorpið þegar félagaskiptaglugginn opnar að nýju.
„Já, það má eiga von á því að við fáum annan markmann til liðs við okkur og verðum með góða samkeppni um þá stöðu. Johanna er mjög flottur markmaður en það er hollt að hafa heilbrigða samkeppni um hverja stöðu fyrir sig og við erum með það þá þegar hún kemur. Við erum að missa Söru Mjöll í skóla erlendis, þannig að við bætum við henni já."
Sjáðu allt viðtalið í spilaranum hér að ofan.
Athugasemdir